QUANNO MORE NU PUETA

======================= a PINO DANIELE

 

Rose, nun v’arapite int’ ’e ciardine,

restate annascunnute.

Pàssere, nun cantate ’n miez’ ’e ffronne,

stateve zitte e mute.

 

Stelle, nun ricamatelo stu cielo.

Luna, nun t’affaccià.

Mare, tu nun te mòvere stasera.

Viento, nun suspirà.

 

E vvuie, canzone, zitte rummanite

nzerrate dint’ ’e core.

E vuie, figliole, nun v’appriparate

pe’ scennere a fa’ ’ammore,

 

Napule vo’ durmì nu suonno ’e lutto

e nun se vo’ scetà,

chiagne p’ ’a morte ’e chistu figlio d’oro

’sta povera città! 

Raffaele Pisani — [email protected]